Terey Hotay Janam Liya Hotaa,
Koi Mujhsa Na Doosra Hotaa ..
Saans Laita Tuu Aur Main Jee Uth'ta,
Kaash Makkah Ki Main Fiza Hotaa ..
Hijraton Mein Parraao Hota Main,
Aur Tuu Khuch Dair Ko Rukaa Hotaa ..
Teray Hujray K Aass Pass Kaheen,
Main Koi Kacha Rastaa Hotaa ..
Beech Taif Bawaqt E Sang-Zani,
Teray Lab Pe Saji Duaa Hota ..
Kisi Ghazwa Mein Zakhmi Ho Ker Main,
Terey Qadmon Mein Jaa Gira Hotaa ..
Kaash Uhad Mein Shareeq Ho Sakta,
Aur Baaqi Na Phir Bacha Hotaa ..
Teri Pakeeza Zindagi Ka Main,
Koi Gumnaam Waqeyaa Hotaa ..
Main Koi Jang-Juu E Arab Hota,
Aur Teray Saamnay Jhukaa Hota ..
Main Bhi Hota Tera Ghulam Koi,
Laakh Kehta, Na Main Rehaa Hotaa ..
Sochta Hun Main Tab Janam Leta,
Jaanay Phir Kya Se Kya Hua Hotaa .. ?
Chaand Hota Teray Zamanay Ka,
Phir Teray Hukam Se Battaa Hotaa ..
Mujh Pe Parrti Jo Teri Chashm E Karam,
Aadmi Kya .. Main Maujzaa Hotaa ..
Asman Hota Ehad E Nabwi Ka,
Tujh Ko Hairat Se Daikhta Hotaa ..
Pairr Hota Khajoor Ka Main Koi,
Jiss Ka Phal Tuu Ne Khaa Liya Hotaa ..
Bacha Hota Ghareeb Baiwa Ka,
Sir Teri Gaud Mein Chupa Liya Hotaa ..
Rasta Hota Teray Guzarnay Ka,
Aur Tera Raasta Dekhta Hota ..
Buutt Hee Hota Mein Khana E Kaaba Mein,
Jo Teray Haath Se Fanaa Hotaa ..
Mujh Ko Khaaliq Banata Ghaar 'Hassan'
Aur Mera Naam Bhi Hiraa Hotaa ..
Terey Hotay Janam Liya Hotaa,
Koi Mujhsa Na Doosra Hotaa .. !!
